أبو زهية وأبو صفار
البااااااااص ياابن الكلب الباص أبو زهية يصيح على خلاوي ..
عند دوار الساعة وبداية شارع تل أبيض أبو زهية وأم زهية وخلاوي (( خليل )) وزهية نازلين يتبضعون من السوق ويجيبون نتيجة تحليل خلاوي .
على زاوية منتدى النخيل عطيني سيكارة يارجل ماغمزتلك نزل خلاص چان طبناهم وچتلنا اللعبة وطلعنالنا ألف ورگة خرجية ياخي والله باقم الجواكر .
(( إثنين طالعين من المنتدى چانم يلعبون قمار )) .
زهية : عرمت بنص الشارع جدام فرن الاندلس ومسكت كذلتها وعينها عالفرن يابا أريد كعك مدرهب (( صمون ))
أم زهية : كرصة مباغتة مع كتم حس لزهية . إمشي ألحز قمتي تشهونين خلنا بس نرجع من التحليل . الشارع مليان صوت ضجة وزمامير وأهل البسطات صياحهم واصل للدويرة
يارجل والله جورج قرداحي . يول لا لا فهرنهايت . يول اقلك جورج قرداحي
يول لا لا فهرنهايت إنت زعم شمعرفك بالعطورات يومنك تجوزت بخيت كلونيا وحت بالعلامة فات بعيونك وقدن حمر مثل الچلب الماچل صابون . (( أثنين واقفين على بسطة عطورات ))
أم زهية : محمد (( ابو زهية )) فطني يومن نرجع من التحليل ناخذ رانات وسراويل للعجيان ترى العندهم تنكبن .
أبو زهية : مع زورة قوية جداً أي قومي عاد تشهوني أنتي وعجيانچ خلنا نخلص نشوف التحليل الخرا ويصير خير .
تقاطع الخضر زحمة حيل كالعادة ، ابو زهية يمشي جدام العيلة بثلث متار وأم زهية كاضبة العجيان . وصلم مخبر الرازي . ناس قاعدة عالدرج (( مبوردة )) والمخبر مليان . حللم لخلاوي طلع معاه أبو صفار . خذم التحليل للدكتور . الدكتور يقول لابو زهية ألحز اكتبلو على دوا وطعمم الوليد حلو بس يكون بدون دسم يقصد (( عسل - مربى )) أبو زهية هز براسو مفهوم مفهوم . جاع ابو زهية اول شي خذا العيلة على ابو عبدو تبع الفرافيش صلخم كل واحد لفتين فرافيش وكاسة لبن . خلاوي إرتفع معاه ابو صفار من الدسم صار يشبه العرنوس .
أم زهية : جدام محل أقمشة مع ابتسامة صفرة لأبو زهية أشوفك يامحمد من زمان ماجبتلي نونو رگعة أريدلي قماشة كوردي العندي كلهن تكشمن . سلهم ابو زهية وكز عالشوارب وفاتم اشترم وطلعم . على زاوية جامع الفواز عوربانات فواكه . خلاوي يابا أريد موز وبردغان . طبعاً خلاوي مرضان وطلباتو كلها مجابة . خذم كيلوين موز وثلث كيلوات بردقان . أبو زهية شايل التحليل والوصفة بس وأم زهية شايلة كلشي . وصلم صيدلية الخضر أم زهية تقول لابو زهية فوت تناوش الدوا .
أبو زهية : يابنت الحلال مابو شي يدچ مثل السعدان دواه عندي .
خطفت رجلها أم زهية على أبو عوربانة البزر عالزاوية وإشترت ثلث كيلوات كصكيص من حر مالها . والله وهما راجعين رجعت زهية جدام فرن الاندلس عرمت بدها كعك مدرهب (( صمون )) جابم لزهية الصمون . جدام محل الجرابات والبدل الداخلي أم زهية تدحق على أبو زهية بطارف عينها على مبدأ بدك بدك مابدك ترى عادي . والله فات ابو زهية اشترى خمس جواز جرابات ودسة كلاسين للويلاد . ابو زهية دشر العيلة وفات عالحلاق تناوش علبة صبغة وعلبة إوكسجين مشان الشوراب المسدلات وغباهن بجيبو يقول شايل كوكائين ..
فات عالسوق الشرجي وبلشت السلامات نص الجرية تلگاها بالسوق، وصلم عند أبو المشبك ،ابو زهية يحاچي أبو المشبك :
حط يابا حط سبع كراص مشبك ويندار على خلاوي يول دواك عندي دواك عندي خلاوي .
ردتلو الروح خلاوي ووجهو صار يعطي على زهري . وصلم البيت ابو زهية چلا ست كراص وخلاوي چلا كرص واحد والحمدلله طاب خلاوي من ابو صفار وصار معاه فقر دم ......