الدنيا شتوية والبرد برا يقص المسمار وانت ملتف متجعوج بفراشك مشان تدفى وبسابع نومه ، فجأة تجيك الوالدة وتبلش بيك ول يابا قوم قوم روح ع الفرن بدنا خبز مشان ناكل عجل نموت من الجوع يا ابني قوم يلا مشان تسجل ع الدور كربانك ، عاد انت نايم ومتجعوج بالغطا و فاتح اثمك وتقول ايييي يلا يما قايم (طبعا انت هين لسعك ماقعدت بس هي لا شعوريا تقولها) وامك تظل توز بيك توز بيك اخر شي تمل وتقلك خليك منجب ياعيبة العيبة اني على اساس مخلفة زلمة اني رايحة اجيب خبز هين انت عاد تقوم غصب عنك (ماظل وراها ورا) وتلبس هالفروة وتلف الجمدانة على راسك وتروح ع الفرن تاتسجل دور وطول الدرب وانت تثرمد مع حالك وتتطوطح بمشيتك يمين ويسار من النعس
وتوصل الفرن وتلاقي عاد الناس واقفة وتسجل ارقام ع الدور (سالفة الارقام طلعت بسبب الزحمة والصياع )وتشوف ربعك بالحارة وتلاقي الناس هذول اللي يتهرجون وهذول اللي عالجين نار ويتدفون حواليها وتلاقي النساوين قاعدات يتهرجن ويتكارضن على بعضهن (طبعا علوم الحارة كلها تطلع بأجتماع النساوين عند الفرن يعني كل وحدة عندها تقرير يومي تستعرضو مع باقي النساوين) وانت تتمشى بفروتك اللي تسحل بالكاع جدام هالنساوين تدور جهلة غاد
وتلاقي عمامك الكبار لافين وجوهم بالجمادين ويستنون الطاكة وموضوع الهرجة عند الفرن عن خدمات الافران الثانية بالمقارنة مع فرن حارتهم ولايخلو الامر من جم مسبة لصاحب الفرن ولا بياع السحلب اللي مشخص ع الزواية وكل حاز يصيح (سحلب حار ياجبار) وعاد تفتح الطاكة ويصفون الناس على ارقامهم على اساس ع الدور وماتحس وتدري الا يبلش التجبيط ع الطاكة والكون والفوضى ويبلشون الكبار يتحسرون والشباب فئة الصياع ينطوطون على هالطاكة ويتكاونون ويبووووه شنو يصير تخرب حتى يتدخل حدا هالزلم الكبار ويصفون معه جم واحد انوب وينظمون الدور وعاد انت ساعتها تاخذ خبز بعد صبر وتروح تشرو ع الرصيف وانت ماسك رغيف حار تلفو وتدرمو وانت حاسس بالنصر انك جبت خبز وتاخذلك ب ١٠ سحلب وتسرد ع البيت مكيف لانك بدك ترجع تنام وتغني
وان شرقن للحقهن وان غربن ياويلي
والبيض خذن عقلي والسمر هدن حيلي😉