دكتور عبدالله
الدنيا شتا .. صباح بارد . وصياح ديچ وچلاب تنبح . وشمس شعشعت من مشرج . الشجر مندي والتركتور والتريلة مندّيات من البرد . قام ابو عبدالله من الفراش (( الدوشگ )) وشال بريجو وراح يتوضى (( يتشاهد ))
ام عبد الله (( هلالة )) قاعدة قبلو .
خيي توضى وصل (( صلي )) أكون حطيتلك فطور ابو عبدالله : خيتي إعلجي الصوبة تراها باردة
وإجعدي الويلاد تايفطرون وكل من يروح على مدرستو .. كعدم يفطرون ..
ابو عبدالله : ها عبداللتي .. شنون الهمة ؟؟ تاجس حالك يطلع معاك شي ؟؟
عبدالله : والله يابا شوفت عينك الليل كلو اقرا وإن شاء الله اموري زينة وادريبك يايابا ماقصرت بعت دونمين من الگاع تاتحطلي دروس خصوصية .
أم عبدالله : الله لايضيعلك تعب ياوليدي ..
ابو عبدالله : يابويا زعم هنا لكُما انتم مجاليع الفقر ياوليدي واريدكم اخير الناس وأتباها بيكم جدام الناس ... الله يفتحها بوجهكم ومايضيّع تعبكم يابويا ..
خلص الفحص وطلع النتايج . وگت عصر ابو عبدالله مجيل بالدار الوسطية . فات يركض عليه عبدالله يابا يابا نجحت وجبت مجموع يقريني طب إن شاءالله ..
ابو عبدالله : مثل المجنون فز . أنا اخو عمتي يامحمد يامحمد صرت دكتور وقام يحدي باللاشعور :
(( إسمع شتقول فطيم اسمع أُم ترچية وطوگن يلمع ))
قام ابو عبدالله وملع الردنية وعلى اثم السكية ضرب ثلث شرجورات ..
جت العمام والخوال تفزع عالفشگ والهلاهل . ضرب البگشن معد يسوى گشر بصلة . شغلم المسجلة والمفتول عاجد بالحوش .
الزلم جاعدة عالسكية وتبارك لابو عبدالله ..
النهار البعدو رجد ابو عبدالله ١٥ ذبيحة وعزم الجرية على شرف الدكتور ..
درس عبدالله طب بالشام وچان ابوه يگطع من اثمو واثم اخوتو ويدزلو خرجية ونوبات يحتاج الامر يبيع فطيمة او خاروف ...
تعرف عبدالله على بنت شامية معاه بالكلية . ويوم من الايام ابو عبدالله ماخذ أم عبدالله عالشام تتحكم عند الدكتور . تواعدم بالكراج خذا عبدالله زميتلو الشامية وراحم يتلكون أهلو ..
حدرم من البولمان ام عبدالله بالزبون والهباري وابو عبدالله بالگلابية والجمدانة والعقال وبوجهووبچفوف ايدينو المفدعات من الفلاحة تعب وشگى سنين ..
زميلة عبدالله استغربت من اللباس وطريقة السلام والتحبحب .. انتبه عليها عبدالله يومن رادت امو تحب زميلتو قامت تكفكف ..
وچان يسحبها على طرف وقاللها ..هذول أهلي الوصلوني للشام بتعبهم وفوق جبينهم الاسمر هذا المصبوغ من الشمس مرسومة حنطة وگطن وصفرا .. روحي يابنت الناس الله ييسرلج أني ثوبي مو من ثوبچ ...