المدرسة باجر بيها احتفال والطلاب من الصبح يشلخون سجر كين وسرو ويزينون باب المدرسة ويعلگون لافتات وإعلام ويصفون طاولات وكراسي بالباحة
والموجه والأستاذ جاسم صاف الطلاب يعلمهم عالهتافات بالاحتفال
وثاني نهار الدنيا تمطر والدروب كلها مرطيسة و باحة المدرسة مكان الاحتفال صارت غدران بدها بس شبابيط وتصير خوش بحيرة
محمد العلي الملقب أبوطلق طالب صف تاسع ذكي ومستواه چان زين …بالابتدائية كل سنة يطلع الاول عالصف بس هسع بايعها وماشي وكره المدرسة من ورى الإدارة والموجهين لشتو چبيرة وجسم ولحيتو يحلقها ومن گعد الصبح وشاف شلون الجو گال ومايدري انو بي احتفال بالمدرسة لانو المبارح جان غايب ماداوم ويقول بقلبو :
يعني اليوم مابي درس رياضة ومابي لعبة طابة وراح يجينا استاذ القومية أو استاذ العسكرية وينطونا شي يجلب المعدة والبطن
استاذ الرياضة يريدها من الله واصلا استاذ الرياضة مالو علاقة بالرياضة لاجسمو رياضي ولاشكلو رياضي ولايفهم شي بالرياضة ظل اربع سنين يقدم بكلوريا وآخر مرة قدم فحص جا رئيس المركز من گرايبو وفتح مجال لكل المركز ونجح شحط وعن طريق واسطات دبر حالو معهد رياضة وصار استاذ رياضة، وعندو طريزيلة يشتغل بيها بالماگف يبيع غنم واكثر الأحيان يصف الطريزيلة عند باب المدرسة ومشيل بيها خواريف يوقع على دفتر الدوام ويروح عالماگف يتجر
ابوطلق واگف برى وگاعد على بلوكة بس حاط چوال ناشف عالبلوكة تاما يتنگع بنطرون الفتوة مي وكامش كتاب القومية يهف بيه عالنار تايخلص من العصفير ….چان يتحمى على جمر جابو من التنور بعد ما امو خبزت شال بالكريك وحط الجمر بالتنكة وجان حاط كاسة چاي وصحن خاثر على طارف صندوق خشب عند حايط الداير الشرجي ورغيف خبز تنور على فخذو ويقمص خاثر ومايحسد الباشا …گام اخوه احمد ازغر منو…نقزو الشيطان وراح جاب عودان حطب گطن وحطهن بگلب التنكة وصارت التنكة عصفير ونزع الجمرية ونزع گعدة ابوطلق وفطورو الرومنسي
ابوطلق : يول انت مثل الشيطان ماتگعد راحة منو طلب منك تجيب حطب ولا يعني لأنك شفتني مبسوط وگلت خليني انزعلو صباحو يازلمة واحدكم الخباثة بدمو …تعال عاد أشعلها تااشوف يا افندي
أحمد : ياخي شسوينالك تاانزعجت وطلع خلگك مو زين جبتلك حطب
ابوطلق : طلع خلگي مو ليش منو طلب منك تجيب حطب ولا يعني بعصك ابليس
أحمد : شفتك بطرگ بدلة الفتوة وحاجفك البرد وگلت اجدد النار طلعت آني الغلطان
ابوطلق : يول أشعلها تااشوف يااخوث مو حطب گطن ومعبي مي لو يجي بطل العالم مايشعلو …
أحمد : طول بالك ياخي هسى اشيل التنكة كلها وازتها بالساجية
ابوطلق : بعد ايش يارجلي بعد ماتعبينا عصفير وصارت ريحتنا تگول ريحة عنز فاطسة
أحمد : زعم منو رايح يشمك بالمدرسة كلها اضرط من حالتنا
ابوطلق : روح انقلع عالمدرسة هذول ربعك يستنونك عالدرب لا اسطرك دفرة اوصلك للصين
تاليتها يجيك عجي ينزع صباحك كل الليل وآني اكوي بالبدلة وبويت القندرة
يطلع الابمن باب الحوش لابس جزمة برجلو وتالي فلت جيشي وملفلف راسو ولابس طاقية صوف وناسف على چتفو كريك يحترف ويشوف ابوطلق لسعو گاعد وماراح عالمدرسة
الاب: اشوفك لسع هين يا بيگ مدري يا افند
ابوطلق : والله يابا الگاع كلها وحل ومراطيس وهسى مااوصل المدرسة الا صاير سينما
الاب: لاتواخذنا لازم نزفتلك درب المدرسة ….انقلع عالمدرسة شتريد تظل تسوي بالبيت سعرك بسعر العالم
ابوطلق : أمرنا لله بس ترى اذا تكاونت آني واستاذ العسكرية لحد يلومني الملاگسة مع الأستاذية والمدير كل يوم معد اتحملها كل يوم من صباح الله ملاطعة وكونات منشان البوط والبدلة والكتافيات والكنزة وكلها علاك المصدي
الاب: ادري ماتگلي انت من دون هالوادم تظل معارض
ابوطلق : اقسم بالله يابا شقلة تبعج البعير …المدير والموجهين طايرين ورانا عالشعر والكتافيات والبدلة واصلا بي اساتذة مايداومون ومحد يحچي معاهم
الاب: اشوف محد يشتكي غيرك ولا تريد تعوف المدرسة …ترى إذا عفتها بالحرام ما تبات بالبيت يوم غير اسرحك بغنم عند گوم الدواس بالبرية
ابوطلق : استاذ الرياضيات وآنسة الفيزيا من طرطوس وصارت نص السنة وماشفنا خلقتهم لهسع ..
الاب: دشرنا هسع وروح عالمدرسة
ابوطلق چفت البنطرون بالجرابات ودحل وصل المدرسة وچان الدرس الاول مبلش ….حيطان المدرسة كل الشتا يظلن مرطبات وخضر بعد المطر ..اصلا كاع المدرسة سبخ لانو لما رادوا يعمرون المدرسة محد فعل يعطي من كاعو وصلة تايعمرون المدرسة .. عمروا المدرسة بعيد عن الجرية بكاع السبخ بسد المقبرة لان الكاع أملاك دولة …
استاذ العسكرية اسمو جاسم نفسية جگمة ولئيم وفاتح دكان بگلب المدرسة …استاذ جاسم واگف على باب المدرسة وشايل خرطوم يستنى كرنك الآنسات لانو اعزب ويظل يتخمل عند الآنسات وبي معلمة من البلد يحوم عليها …
وصل ابوطلق وكرنك الآنسات مع بعضهم على باب المدرسة
جاسم شاف ابوطلق وطارت عصافير مخو اصلا يكره ابوطلق وجاسم جدام الآنسات يريد يصير بطل ويريد يضرب ابوطلق ويهينو ….
ابوطلق ماوصل للمدرسة إلا بدلة الفتوة مليصة كلها وحل.. والقندرة السودة معد ينعرف لونها …
تگلط استاذ جاسم : ليش ياجحش متأخر عن المدرسة بدي اربي بيك كل واحد سرسري
ابوطلق : انت على مين تگول جحش
جاسم : ليش بي غيرك قندرة
الآنسات واگفات والشفير حدر
ابوطلق : آني قندرة يا ابن القندرة تطلع ستين جحش
جاسم : يرفع ايدو ويضرب ابوطلق بالخرطوم على راسو…
ابوطلق : يزت الكتب من ايدو ويلبع جاسم بكس بنص وجهو ويكمش راسو وينطحو ويرتمي استاذ جاسم على الگاع ويگبر فوكو ابوطلق وياخذ منو الخرطوم ولخ على راس استاذ جاسم ويحط قندرتو على راسو …
كل هالشي وماانشفى غليلو …
يجي شفير الفكس تايحجز بس ابوطلق سحب موس …وصارن الآنسات يصيحن
ابوطلق : بدي اربي بيك استاذ فلتان
مدير المدرسة عالصوت طلع : ابوطلق لاتضرب استاذ جاسم بالموس
ابوطلق : خايف على جاسم ؟؟ كلكم انذل من بعضكم ابوطلق حاط قندرتو على بلاجم استاذ جاسم ويسولف
طلعت المدرسة والاستاذية وكلها شافت الموقف
صوت ماذنه الجامع يذيع خبر وفاة شمسة زوجة الحاج رشيد العلاج ميتة بالشام وباچر يجيبونها من الشام
جدام المدرسة ابوطلق لسعو باطح استاذ جاسم والعالم اترجى ابوطلق يبعد عنو ومايفعل
هدوم جاسم صارت مي لان الكاع كلها مي والدنيا برد وصار يرجف
بالصدفة يمر ابو عواد راكب التركتور ومعلگ دسك ويوشوف لمة العالم حدر تايشوف شنو القصة وانو ابوطلق العلي …
ابو عواد شاور ابوطلق بأذنو : يول ابوطلق هذول هسى يجيبولك الشرطة ويسجنونك وأكيد اتصلوا عالشرطة روح معاي لايكمشونك ..
ابوطلق لم كتبو من الگاع ودفر جاسم جلاق على محاشمو وراح ….
جاسم من ورى جلاق ابوطلق انگطع نفسو وصار يتعصر بس معد يگدر يحط ادينو على مكان ضربة الچلاق لان الآنسات واگفات …
والله يمكن ابوطلق ضيع رجولة استاذ جاسم بچلاقو ومعد يجيه ضنى
يركب جاسم بجنب ابو عواد عالرفراف ويمشون بدرب فلاحة خاف اتلگاهم الشرطة ….
دواليب التركتور تنفض عليهم وحل والدرب زلگ
ابو عواد يسوگ التركتور ولابس فروة وحاط ادينو عالدركسيون وساكت ….
وصلم بيت ابو عواد ….. حدروا من التركتور
ابو عواد : فوت گبل محد يشوفك ترى جريتنا ماتعرف الصادق من الچذاب كلهم يكثكثون للشرطة والفرقة الحزبية …هسى يشوفك واحد ونعلق…
يابنوات جيبن لابوطلق هدوم خلي يبدل هدومو صارت كلها وحل….فوت يابا ابوطلق البنوات مثل خواتك….
يطلع سعيد ابن ابو عواد وسعيد مدشر المدرسة من زمان ويشتغل على تركتور اهلو وهو ربيع ابوطلق عالصوت ويشوف ابوطلق جاي مع ابوه ..
سعيد : شبيكم تگول چاتلين زلمة ومنهزمين …يابا خاف دعست حدا بالتركتور
ابو عواد : لسع مادعست حدا بس يمچني شي يوم ادعسك …روح اشعل الصوبة وخلي ابوطلق يتحمى عليها ماتشوفو بطرگ بدلة الفتوة …
سعيد : هلا ابو طلق الورد ..شمسوي يول من الدگات اشوفك مجلغم وحل…بالحرام ماجابك ابوي ألا مسويلك عرس …تعال خلينا نفوت وسولفلي …..
ابوطلق : ابو سعود دشرني خلني ارتاح ترى راسي يريد يطگ وسوينا كاسة چاي خليني اصحي…
يشعلون الصوبة وسعيد يجيب بريچ الچاي يحطو عالصوبة وابوطلق لبس وحدة من گلاليب سعيد وسروال صوف وفلت لونو چان اسود بس من كثر الغسيل باچر ..ابوطلق حاط رجلينو على قاعدة الصوبة ….
ابوطلق : ابو سعود صبلي كاسة وناوشني سكارة …
سعود : هاك خلي الباكية معاك وسولفلي شنو القصة …
سعيد بعد ماسمع القصة : ابو طلق دشرك منهم هذول ليش آني ليش دشرت المدرسة مو من وراهم …تريد هسى نروح نربط للمدير وجاسم وچتلة من اللي يحبهن گلبك
ابوطلق : لاياخي مو هسع بعدين
الاب يجي المغرب…وابنو احمد يسولفلو قصة ابوطلق والمدرسة…
الاب: اي هاي اللي يريدها ابوطلق يعرس علينا باچر ماتظل سيارة شرطة وأمن ومخابرات ماتطرد ورانا
وينو هسع الصرماية ابوطلق يول آني كل النهار اسجي بالبرد وملتعن ابوي منشان اجي ارگع فصوص ابوطلق ..صارلي بطل عند اذني
ونفصل أبو طلق من جميع مدارس القطر وحاليا هو راعي نوق بالكويت