كريسمس قدور
قدور صالخ جدرية مجدرة وفحلين بصل ومتدثر بالبطانية ونايم ،
أم خميس تدفسو برجلها وتقلو :
قوووم قدور قوم ، قضيت هالعمر كلو نوم غربة ربعنا بأوربا ،
رفع طارف البطانية قدور وطلع وهج نار مع ريحة بصل من جوا البطانية ،
قدور : ها شبي عمة شتريدين ؟؟؟
أم خميس : قوم خذني عالحديقة البيضا ؟
قدور : عليش عمة عندج موعد ؟
داست ببطنو أم خميس رادت تضرطو ،
موعد شنو يا داشر ؟؟!!
قدور : إلا شموديچ بهالزنطارية البرد ياعمتي ،
أم خميس : قوم تا نجيب شجرة الكرمرس ،
قدور : كرمرس شنو ؟؟؟!!!
خاف تمسّحتي عمة ؟؟ (( صرتي مسيحية ))
أم خميس حاطة رجلها على چتاف قدور وهو نايم وتقلو : تمسّحت شنهو يامال اللطم ، أقلك قوم خلنا نجيب شجرة صغيرة للكرمرس ، اليوم كاعدين أني والجارات ٢ من القامشلي ووحدة من حلب وإتفقنا نسهر ليلة راس السنة والحضر يقولولها (( كرمرس ))
وتوازعنا الطلبات ، وحدة تجيب برتقال وتفاح ، ووحدة تجيب تخليطة وموز ، وحدة تجيب تبولة وكولا ، وأني أجيب شجرة الميلاد (( الكرمرس )) ،
قدور : عمتي عيد راس السنة غير الكرمرس تبعج ، بعدين أروح معاچ بس بشرط ؟ كلشي يزود من التخليطة والكاتو ليا ؟
راحم عالحديقة البيضا الدنيا عصريات ، قدور جعد يشلع الشجرة الصغيرة من جذورها ، أم خميس تراقب لقدور من ورا شبك الحديقة ،
تكبس على قدور دورية شرطة ،
العنصر جا يتسحلب تسلحب ومسك قدور من ظهرو من قبة قميصو ،
قدور وجهو صار أصفر ،
العنصر : شجعد تسوي ولاك ؟؟؟
قدور : جعد أتطمن الشجرة جعد يصلها مي لي جوا ألا لأ ؟؟
العنصر خرط قدور چف طلع من خشتو نص عدس المجدرة ،
قدور : طول بالك يامعلم ، عمتي رمسة اليوم عندها كرموس ؟؟؟
العنصر : كرموس شنو ؟
قدور : ليلة راس السنة ،
العنصر : قصدك الكرسمس ،
قدور : أيوا هذا هو ،
العنصر : عمتك إسمها رمسة وتريد تحتفل بعيد الكريسمس ، الله ماقالها ..
قدور : عمتي چان حلمها يكون اسمها كاترين ، بس ظروف الجرية ماچانت تساعد ،
طبعاً أم خميس ثاري من شايفة العنصر چبط فوق قدور ، حطت عباتها بإثمها ويافكيك ، انهزمت عالبيت تفزع أبو خميس ،
ركّبم قدور بالسيارة ، قدور من الخوف صابتو مثل الحازوقة وفوقها ماچل بصل ، كل ما تجي الحازوقة ياكل طيارة على ركبتو ، ماوصلم قسم الشرطة الا رقبتو صايرة بعرض الصوبة وخمرية من الجطل ،
فاتت أم خميس على أبو خميس نايم ويشخر ،
أم خميس : أحمد أحمد ياأحمد
أبو خميس نايم مو حاس ،
أم خميس علت صوتها : أحمدددددددددددد
فز أبو خميس وچان يقلها : شبي رمسة فات النظام عالرگة ؟
أم خميس : لا
أبو خميس : فات أرطغرل ؟
أم خميس : لا
أبو خميس : فاتم المغول ؟
أم خميس : لا لا بس الشرطة خذم قدور ،
أبو خميس : يابنت الحلال بستين جهنم أني قلت شصاير ؟
أم خميس : قوم ياابن الحلال لونو كرايبك چان قمت طاير تداعي وراه ،
إستجعد أبو خميس وچان يقلها :
شبي الكديش شمجيف تا ماخذينو ؟
أم خميس : سد وجهي هو مالو صوج أني جيت كعدتو تايروح يبوقلي شجرة صغيرة ،
أبو خميس : شكارچ بالشجرة رمسة ؟
طلع عندنا بالحوش حقل غاز ؟؟ ألا بير نفط ؟؟؟ وتريدين تدشنين المشروع بشجرة صغيرة !!!
أم خميس : لا لا ، بس اتفقنا أني وأم هاكوب وأم سركيس وأم غيڤون نحيي ليلة الكرمرس ؟
أبو خميس فتح إثمو متفاجىء ، الكرمرس شنو رمسة ؟؟!!
أم خميس : الكرمرس هو ليلة رأس السنة ، والشجرة هي شجرة الميلاد ،
بحركة بهلوانية تناوش أبو خميس الكلاش الفلين وحش أم خميس : كرمرس يارمسة أنتي ليلة عيد الضحية تعشين (( تنامين )) من المغرب يقول لاكطة عشر دوانم گطن ،
قام ابو خميس ولبس وطلع عالقسم يداعي ورا قدور ، فات عالقسم ووصل لغرفة المقدم ،
جعد يحققون مع قدور بمكتب المقدم ، لسع مافات ابو خميس وإنو قدور يأشر بيدو عليه ويقلهم : هذا هو جوزها ،
أبو خميس : بضيت على عمتك يا نذل !!!
تلفزيون مكتب المقدم شغال والمقدم كاضب الجهاز ويغير بالقنوات ،
المقدم : مرتك ياسيد ابو خميس عم تخرب البيئة !!!
أبو خميس : ربك عاد الرقة ماشاء الله مو مضروب بيها فشكة ومابي بلوكة متزحزحة من مكانها وجت رمسة تريد تخرب ديكورها ،
المقدم: مرتك وينها ؟
أبو خميس : قاعده تحتفل بالكرمس عند الجيران
المقدم : طيب روح انت وتعال بعد راس السنه لانو عطله هل اليومين مشان تكتب تعهد ويطلع
قدور : يومين يبوه علينا زين محنا بايقين عوربانه بابا نويق جان رحنا اعدام