وصاية أبو خميس
الحلقة الأولى :
حيبرباش عاليحدر ، كود إن الله حرمو الأ أجدع إذانك بالجدوم وأرميهن للجرو ، أجس زروري تكصمت چبط بساع يامال الثبر ، عنيش تشلبطت عالحايط كراعك كراع العنز الزاربة ، إشعليه ياابو فصوص ، شبي عجل تريد تنام عالحايط ، يابا وحات النبي ألحز لأخلي أبوك يدبچ بقلبك ...
أم أبو خميس تحاچي حفيدها حمود ...
الدنيا عصر ، بوحدة من جرياتنا ، الكاع مكشوشة ومرشوشة مي والحصران والسفنجات ممدودة عالسكية ،
أجبل من بعيد أبو خميس عالحوش شايل بإيدو چياس تلگنو العجيات الزغار ، جا أبويا جا أبويا ، حمود لسعو علقان عالحايط ،
أبو خميس يسأل إمو : شبي يما شمسوي الساقط ؟؟؟
أم أبو خميس : شلهب قلبي ريتو بالمالطية أقلو حدر مايحدر ، چان بالقاووش وأكشر ماعلي طلعت الجحشة من القاووش وبعدها طلع هو ويشخل عرق عرگان حيل ، أقلو شچنت تسوي مايعلم ،
أبو خميس : هههه ضحكة صفرة ، اي خلاص عديها عديها ، العجي يمچنو بلغ .
أم أبو خميس : تفي عليك زاد أنت أسغط منو ..
أبو خميس : وينك أمك يوال ؟؟
حمود من فوق الحايط ويلعب بخشتو : مدري يابا يمچن عند عمامي الاسماعين ..
أبو خميس : طالعي هالتلفزيون خاتون ماني أبوچ وسويلي چيدان چاي روحة الرقة نشفت ريجي ،
تمدد أبو خميس ولف رجل على رجل والكلابية سالتة ورجلينو حلس ملس مابهن شعره ولابس شرعي أبيض ،
أجبلت من بعيد أم خميس شايلة چيس بي قماشات كودري ،
أبو خميس : وين چنتي ياسعد ؟؟!!
أم خميس : بالبرلمان زعم أصوب چنت !! رحت عالاسماعين جايهم حواج وخذيت چم قماشة لهل بنيات جانا الصيف ،
الله يهنيها ويرحمها أخت مرت اسماعين رجلها بعد ماماتت باني جامع ومسمي عليها !!
أبو خميس : يابنت الحلال أني من زمان مشتري الكاع مشان الجامع بس انتي ماجعد ،
أم خميس : ماجعد شنهو ها ؟؟؟ قلي ماجعد شنهو !؟؟؟
أبو خميس : ماجعد تخبزين الخيز زين كلو معجّن ،
صارت الساعة ٨ بالليل ، والبك والبرغش يتفتل جدام الليونات وجدام شاشة التلفزيون ،
أم أبو خميس متمددة عالطراحة : تعالي خاتون رميني راناتي أجس ظهري يوجعني ، جت خاتون من المطبخ ، ولي خاتون أشوف وجهچ وارم ؟؟
خاتون : حباب كلو من مرت الشرطي باعتني خلطة مشان الوجه وتقلي من الجرية الشمالية وجاية من حلب وأجس بيها ريحة طحين ،
أم أبو خميس : دحجي الداشرة بنت الدشر يومنها عزبة ماضل لوح قطن ماقضبوها بي هي وعجيان الجرية ،
طلعت الاخبار والكل عينو عالتلفزيون ، المذيعة تقول : الرئيس بارك إوباما بعد اجتماعه مع الرئيس فلاديمير بوتين يعلنان أن الرقة تحت الوصاية الدولية ،
كب أبو خميس من السفنجة طار فوووق وچان يصيح : والنبي يمچن صحيح تونا خلصنا والنبايا ، شلح الجمدانة وقام يلوح بيها ويغني ،
جانا الفرج ياخاتون .
جانا الفرج ياخاتون .
خاتون تشاور حبابتها : حباب شنو يعني الوصاية الدولية ؟؟؟
أم أبو خميس : يعني يابنيتي يتوصون بينا خاف علينا عايزة (( دخان - خبز - عشبة چاي - صابون قار - واذا بيهم نسوان يجيبون لچ خلطة زينة مو مثل گية بنت أم خوبات كلها طحين ))
فات حمود يركض من باب الحوش ووجهو أصفر ويصيح :
يابا يااااابا ....
يتبع ......
الحلقة الثانية :
فات حمود يركض من باب الحوش ووجهو أصفر ويصيح :
يابا يااااابا ....
أبو خميس : شبيك يوال منهو حايدك ؟؟؟
حمود : محد يابا بس قضبم حرامي بمطبخ الحسين العيد ،
أبو خميس : ابن المهرومة المساكين هذول شعندهم من الخرا ، جايكم جايكم وطلع يركض أبو خميس ،
وصلم عالمطبخ الحرامي ممدد بالگاع وفوقو دحروج إبن راعي البيت دحروج واحد هرش وزنو شي ١٦٠ كيلو يقول شل قطن وجنب راس الحرامي بي صينية بافون مطعوجة بيها صحن كريض بيذنجان ناشف وصحن بي خيار وبندورة زاد ناشفات وكصم خبز يابسة ، فات أبو خميس وچان يقول لدحروج قوم عن الزلمة والله يمكنك ضرطتو ، المطبخ مليان زلم وعجيان زغار يدحقون عالحرامي بإستغراب والنساوين يتباوعن من الطاكة والباب ، دنجر أبو خميس عالحرامي وقالو :
شجاي تبوگ ولاك سربوت ؟؟؟
الحرامي : والله عمو اريد اخذ طحين لانو صارلنا ثلث تيام ماعندنا خبز بالبيت ،
أبو خميس : تخبزون منو خبز الا تستعملونو مشان خلطات للوجه والبشرة ؟؟؟!!
الحرامي : لا لا عمو والله نخبز بيه
حمود : لايابا چذاب عمتي أمونة شافتو شايل دبشية وثلث عجورات ،
الحرامي : عمو أخوتي الصغار من ثلث تيام ماحطم لقمة ببطونهم ،
أبو خميس : نظرة حزن قوية غورقن عيونو
(( موسيقة تصويرية ناي حزين )) مد إيدو وقوّم الحرامي وقاللهم رجعم الطحين لمكانو وفتشو وخذم كلشي بجيبو وبعدها على دفسة دفسة واقلعوه (( مانفعت موسيقة الناي )) رجعت الناس على بيوتها أبو خميس معد يجي نوم مشان موضوع الوصاية الدولية ، يعرفلو أمين فرقة حزبية قاعد بالشام ،
الدنيا ليل والناس نايمة والاضوية طافية وسيكارة أبو خميس جمرتها منورة ، الچيدان ماضل بي شوي ويشخلو تشخل ، يفكر شلون بدو يجمع الجرية مشان يتفقون على موضوع الوصاية الدولية وشنو الدولة اللي يختارونها تا تصير الوصية على جريتهم ،
أبو خميس يسحب بسيكارة الحمراء وعينو عالسما ويفكر شلون يريد يصير الممثل للجرية جدام الدولة التي بدها تكون وصية عليهم ،
أبو خميس : زريفة زريفة يكعد أم خميس ول زريفة نايمة كل هذا تعبانة علواه هدب داب ،
أم خميس : مفتحة عين ومغمضة عين تشبه السعلوة ها شبيك محمد شبيك خاف بطنك توجعك ؟؟؟
أبو خميس : لا لا بطچ الشوم ، باچر من تفيعين الصبح تدورين الجرية بيت بيت تقوليلهم الاجتماع المغرب عندنا بالحوش بي موضوع ضروري والكل يحضر ،
أم خميس : شبيكا محمد ؟؟؟ خاف تريد تموت عليش تريد تجمع الجرية ؟؟؟
أبو خميس : أريد أموت مات حيلچ إن شاء الله وچان يكفشها من شعرها ، نامي نامي نامت عليچ سلمى الليالي ،
طلع الصبح وضربت الشمس عالسكية ،
أم أبو خميس قاعدة من الشفاك ومادة لبادة بالفي وفالة الهباري والدكوك برجلينها يحكنها ، وحمود طاير اللحاف من فوقو ، ومو لابس جوا الكلابية شي ورجلينو مفتوحات (( برونزاج طبيعي )) خاتون مغطية وجهها بچيس نايلون أسود وناقبتو من عند عيونها مشان بشرتها لانو الخلطة تتحسس من الشمس ، أبو خميس فاتح إثمو ونايم مزبوط لانو للصبح سهران يفكر بالوصاية الدولية ومروّل عالوسادة والنفاضة مليانة جعوب حمراء والچيدان غطاوتو عند رجليه ،
كعدت خلق الله ، لمم فرشهم ، خاتون لسع الچيس بوجهها يقول الجرية مضروبة غاز كلور ،
أم خميس تصيح لأبو خميس : تعال تعال محمد شوف عجيك شيسوي ،
فاتم عالحمام وثاري حمود قالب قازان المي وواقف فوقو تايوصل المراية وجعد يحلق شواربو ولحيتو بمكينة حلاقة أبو خميس ،
أبو خميس : هاي شجعد تسوي يوال ؟؟؟
حمود : أريد أحلت لحيتي وشواربو يابا بلچي يطلعن ،
أبو خميس : إي وليدي مايخالف بس لاتحلق شي ثاني ، أبوك جعد يحلق بالمكينة شاربو ولحيتو . ولي خلصت روح دور على كل زلم الجرية وقلهم اليوم المغرب يجون علينا بي موضوع ضروري ،
أم أبو خميس : ول هاك هاك محمد (( أبو خميس )) إعطي حمود مية وركة خلو يروح يجيب تاي تا خاتون تغسل عليا وتغسل هدومي ،
أبو خميس : زريفة يا زريفة إغسليلي ثوبي الفضي وإغسلي الجمدانة ودزي عالاسماعين خلهم يدزون الكاوية اليوم عندنا جمعة هين وقام يفتل بالشارب ، أم خميس طلع وجهها يومن شافتو يفتل بالشارب تحسب بالليل يصير شي ،،
الحلقة الأخيرة :
صارت الدنيا مغرب وأهل الجرية بلشت تلتم بحوش أبو خميس ،
سيارات وبيكابات وهوندايات مازوت وطريزينات ومتورات part ..
حمود متدافشين هو وابن حسين العيد أخو دحروج :
كحز غاد عن السيارة هذا جاي علينا روح على حوشكم ..
خاتون مسكينة ماطلعت من المطبخ تتناوگ من الطاكة والچيس بوجهها ، وجهها كلو ماحالو يورم ويعطي على خضار ،،
أم خميس : جدام المطبخ مادة حصيرة وجامعة النساوين وتعطيهن شرح مفصل عن الوصاية الدولية :
دحجن الوصاية الدولية يعني شلون يومن چان رئيس الجمعية الفلاحية أبو حواس يستلم حساب الحنطة و فيشة القطن عن فلاليح الجمعية منشان مصلحتهم لأنهم مايعرفون و يخصم منهن على كيفو تبرعات للسودان وغزة ، و هو واضع سياسة الجرية
و يمثلنا جدام مخفر الشرطة بالجرية و مدير الناحية ، هذي هي الوصاية الدولية ،
أم أبو خميس :
كاضبة بزاوية سبع ثمن عجّز وتشرحلهن عن الوصاية الدولية ،
شفتن بونات الرز والسكر والچاي هذن يجن ببلاش كلهن ويضلون يديرون بالهم علينا وعلى ولدنا وحت عالدواب يدويرون بالهم ومساكين ماياخذون نونو وركة ،
طلع أبو خميس من الدار الوسطية المحرمة مكوية تكص راس العصفور والشوارب مصبوغات والدقن محلوتة والكلابية مكوية وحاط رياح ، وقف على طارف السكية وطالع سيكارة حمراء وشغلها بجداحة خضرا ، طبعاً بهاللحظات حمود انفقد محد يعرف وينو غاب عن العين ،
أبو خميس :
مرحبا ياشباب يندار عالعواجيز مرحبا يابنات وكلهن ينردن بصوت واحد : (( أهلن ياعيني ))
اليوم جمعتكم هين لانو قالم بالاخبار صار عالرقة وصاية دولية ، ولازم نتفق عالدولة اللي نخليها وصية علينا،
چط سرّوح مصلح الببورات بالجرية وإنو يقول : أني اريد أختار على كيفي أني أريد ألمانيا محمدنا قاد ويقول يمممح ياطيب النسوان غاد والألمان ينطون مصاري چثير غاد
واحد من الشياب قال : نريد روسيا وبلشت الشياب تمسد شواربها ، طبعاً نصهم بعثية عتيجة ، شباب الجرية بالزاوية نريد الارجنتين كرمال عين ميسي ،
دحروج يريد دولة ريال مدريد مشان رونالدو يحسبها دولة ،
بعض الرفاق القدامى يردون كوبا منشان فيدل كاسترو يحسبونو لسعو رئيس ، أبو الدكان الحلبي يريد الصين منشان البضاعة المزورة ،
العزبات يريدن تركيا مشان مهند ، ولميس ويحيى ،
طبعاً النقاش بصوت عالي والصياح واصل لطارف الجرية والعجيان يلعبون عالسيارات والنسوان متكاونات يقول حمام مقطوعة ميتو ،
بي شايب قاعد بزواية الحوش ويتسمع .
وقف حيلو وچان يصيح بالناس ،
كثر الهلط مامنو فايدة ، والضراط مايقلي بيض ،،،
الرقة طول عمرها عايشة تحت الوصاية من عهد الإستقلال لهاليوم. ..و احنا وصلنا حالنا لهالمواصيل، احنا زغرّنا كبارنا و المثل يقول : " اللي مالو كبير مالو دبير ".
و هذي تاليتها من أصل مليون رقاوي تشرد 700 ألف، ناس ما عاد تشوف ناسها يعلم الله إلا بالآخرة.
اليوم ندور دولة تستر علينا و هم كلهم تكالبم علينا. ..
الرقة ما بدها وصاية ، بعون ترجع بس لازم عاد يكونون اهلها تعلمم درس العمر كلو ماينسونو والحقد البين الناس يولي لانو الناس تعبت .
وقت الصحيح البلد مايفك ضيجتها الأ أهلها ...
أم أبو خميس كاضبة حمود من إذانو .
أبو خميس : شبي يما شسوى النذل ؟؟
أم أبو خميس : مثل هذيج المرة زاد طلع من القاووش عرگان !!؟؟؟
أنت قايلو يسوي وصاية دولية على الجحشة الملحة ؟؟
أبو خميس : هههه ضحكة صفرة ،، عادي يمكنو فك ضيجتو ،،،
والحمدلله خاتون من ورا الخلطة طلع بوجهها عشب ...
(( هربنا وتركناها وننظر وننتظر بفارغ الصبر لمن يخلصنا ويخلصها من هذا الكابوس ))