علامة فارقة
ياخي والنبي مايجينا شي وبعدين هذول الجماعة يومن نطلع مانقلهم رايحين نقبض الرواتب ، نقلهم رايحين نتحكم عالدكاترة ،
أبو خليل وأبو حسين ، ولد عم وموظفين بإحدى الدوائر الحكومية سابقاً بالرقة ،
أعمارهم تقريباً ٤٥ عام ،
أبو خليل واحد خنابة إبن حرام ، وأبو حسين مسكين على نياتو ،
جابم تقارير طبية من واحد من دكاترة الرقة ، إنهم مرضانين وركبم البولمان وعالشام ،
الرواتب متراكمات تقريباً لكل واحد منهم مليون ليرة ،
عند حاجز الجماعة وقف البولمان وطلع واحد عالبولمان ، على وين رايحين وشعندكم وشوفونا الهويات ومن هالكلام ، قبل يوصل على كرسي اب خليل وأبو حسين
، ابو حسين يبلع بريجو ويقول لابو خليل : جانا يوال جانا والنبايا ألحز يكشفنا رايحين نقبض الرواتب ،
كرصو أبو خليل من رجلو وقالو أنت لا تحجي شي منوبة ،
عنصر : وين رايحين ؟
أبو خليل : عالشام رايحين نتحكم ،
العنصر : وين التقرير ؟
ابو حسين بسرعة البرق شمط التقرير وناوشو اياه ،
العنصر : شكد راح تضلون غاد ووين بيوتكم ، وبيها حدا الا فاضية ؟؟
چط أبو خليل : روحة رجعة للدكتور ، خاف تحسبنا فرحانين عالروحة على ديار المرتدين ، حاربهم الله ،
العنصر : بارك الله بكم ،
مشى البولمان ،
أبو حسين : ياخي ماشاء الله عليك أقسم بالله أنت داهية ،
أبو خليل : خير خير هذا عدا ، بس أچل الخرا عند حاجز الربع ،
قبل دخولية حمص ،
حاجز جيش نظامي ،
طلع عسكري لم الهوايا ونزل ، وبعد شي ربع ساعة رجع ، ابو خليل وأبو حسين مادين عناگهم من فوق كراسي البولمان ،
العسكري: إسماعيل محمد الإسماعيل ،
أبو حسين على نيتو من الرعبة يصيح : يامحمد حاضر هين هين ،
العسكري: تعال إنزل ،
أبو حسين كاضب بنطرون أبو خليل ويقلو :
خاف هذا الحاجز القلت عليه ،
أبو خليل لحگ أبو حسين ماتركو ، صحيح هو سربوت بس راعي نخوة وماترك صاحبو وابن عمو ،
المقدم قاعد جدام المحرس على طاولة وجدامو كمبيوتر ،
المقدم : وينو اسماعيل محمد الاسماعيل ،
أب حسين : هذا أني سيدي
المقدم : تحريض على التظاهر وتمويل إرهاب يا صرماية ،
أبو حسين : تمويل إيش صخام إيش إحنا لاكين ناكل ياسيدي ،
أبو خليل : ياسيدي ممكن تشابه أسماء ، إسماعيل زلمة موظف وحافظ نشيد البعث أكثر من أسماء ولد عمو ،
المقدم : ومين هنت ولاك لتحكي ؟
أبو حسين : وحات النبي يمچنا رحنا ،
أبو خليل : أنا محمد خالد الإسماعيل ، واسماعيل يصير إبن عمي وزميلي بالعمل ، نحن موظفين دولة وجايين عالشام نقبض رواتبنا ،
المقدم : وكمان تقبضو مصاري ، والله لألعن اللي بزرك إنتي وياه ،
أبو حسين : يامعلم طول بالك الأرهابي المسعد أبو مظاهرات المسجل عندكم زاد إسم إمو المهدومة خاتون العلي ؟
جا هاتف عالمقدم وچان يقول لابو حسين : خراس ، وصاح للعسكري قالو فوتهم عالمحرس ومشي البولمان ،
راح المقدم يحجي هاتف ، وابو حسين وابو خليل فاتم عالمحرس ،
أبو خليل: ياخي منين طلعنا هذا الأكشر إسماعيل المحمد الإسماعيل ، يامحمد جريمة الارهاب هين بالشام گصاص ،
أبو حسين : گصاص إيش مال اللطم ، أني گي إرهاب گي تظاهر ؟؟ كل المظاهرات الطلعت بالجرية العصر أني وقتها چنت أسگي بالگاع ،
أبو خليل : أني أعرف هالسوالف بس هما عاد شيفهمهم هالكلام ، يقلك عاد جوا بي محققين ياربي دخليك كل واحد چف إيدو يقول كاروكة ، وعداك عن بالكهربا والشبح عالسقف ، تخيل الموقف ، أحي أحي أجس وقف شعر جلدي ،
أبو حسين وجهو صار أصفر ليمونة مابي نقطة دم ، يامحمد بقبر عمي خالد تحجي صحيح ، أجس من ألحز رجلي معد تحملني من الضرب ،
أبو خليل : طيب مابي علامة فارقة وواضحة بجسمك ؟ نقدر نقلهم تتأكدون عن طريقها ؟؟!!
أبو حسين : ياخي والله تراهو مو وكت التمطعز أني تلفت أعصابي وأنت تهمزا ؟
أبو خليل : ياخي والله مهو تمطّعز ، بي علامات مميزة ؟
أبو حسين : بي شامة چبيرة فوق ساجية ظهري ،
العسكري الواقف على باب المحرس شنٌور إذانو وچان يلتفت على أب حسين ،
أبو خليل يضحك ويقول لأبو حسين : وهي تهمة جديدة ألحز شنون بدنا نشرح لهل الشارب الغانم (( يقصد العسكري )) شنو معنى ساجية ظهرك ؟
صاح المقدم من بعيد للعسكري جيبهم من جوا ،
طالع العسكري ابو حسين وابو خليل وخذاهم عالمقدم ، أبو حسين الفقير يسحل بزرورو ،
المقدم : ولك يااسماعيل لو طالع أنتي نفسو هو إبن الستين شريفة اللي مطلوب لعبدتك ديل العجل ، أنتوً أهل المناطق الشرقية بدكن فرمتا من جديد ،
وقفو هون عجنب وبس بيمرق بولمان إنقلعوا من هون ،
أب حسين وجهو ورّد من جديد ،
يحاچي ابو خليل : يامحمد يعني دشرونا ؟
أب خليل : أي أي دشرونا ،
جا العسكري يمشي عليهم أثاري العسكري من ريف الدير وسمعان كل الحديث ويعرف زين ساجية الظهر ، ويومن صار بنصهم وچان يحط راسو بين روسهم تا محد يسمع ، وقاللهم :
دحچ علي إسماعيل إن ضليت شايل هذي الهوية وتطلع من الرقة إلا ساجية ظهرك تصير إرتوازية ،
بجية بولمان بس طالع من الشام مو داخل عليها ، ويزت حالو عليه ابو حسين وهو يركض عليه يحاچي أبو خليل :
الرواتب معد أريدهن وحات كلام الله إذا أفوت عالشام حت الجني الأزرگ راجع على هلي