أميركا في الرقة
كم هير كم هير .... ليجاي الدرب ليجاي
الجزء الأول
أبو طلال : يابا والنبي ألا تفوت أميركا عالرقة وهذاك الوقت الأ بالصحيح يلعبون بحسبتنا ،
أبو عناد : يول بس إنضرط أنت شمفهمك بالمجريات وتداعيات المرحلة المقبلة ،
وبعدين يامرحبا يامرحبا بالحضارة والتقدم والتطور ،
أبو طلال : حضارة إيش يول والله هذولا يهود ألا يعبدونا ذيل العجل ، البلية الأحمر طرامب والنبي يقولون ولا طكة ،
الله ياربي عجل مكتوب علينا العمر كلو شگى وصلخ صواريخ بينا وجاك الواوي وجاك الذيب ،
يتمشون الساعة سبعة المسا بالرقة بشارع المحافظ ، الرقة تقريباً فاضية ،
أبو عناد : أقلك شغلة وتصدقني ؟
أبو طلال : شنهو ؟
أبو عناد : تعرف إنو أهل الرقة بالأصل أميركان ، وإفطن مو حي الله أميركان ترانا زاد من روس أميركا ،
أبو طلال : دحگم عاد يولم چذبان ؟ هاذي شنون عاد زبطت معاك ، سودتك هذي إش جابها لأميركا !!!؟؟؟ حرام يقولنك من شمال جيبوتي ،
أبو عناد : يول علي الحرام حرم رجال نحن من روس أميركا ومن أمريكان الهنود الحمر زاد ، هذول بالأساس هم أصل أميركا ،
إسمع وركز معايا ، جدنا نحن بالأساس أميركي هندي أحمر من شمال فلوريدا ، وأولي تكاون هو وأميركي درجة ثانية من شرجي نيوجرسي جدو بالأساس بولوني بس من زمان بأميركا ، المهم تكاونم على حد كاع وجا جدنا السبع وبعج قلب الأميركي البولوني بقلاعة الشوندر وبعدها جلى ورحل عالرقة وزبن بالرقة ، والرگة تسمت رگة لأنو رحمة جدنا الأميركي الهندي الأحمر إسمو (( روكوي )) وحلفم يمين الأوليين إنو كريستوف كولومبس أصلو شعباني عمامو العفادلة وخوالو الولدة وخوال أبوه الصبخة وخوال إمو غول الرقة مدري العجيلي مدري البچري !!! معد أتذكر زين ،
على ماوصلم دوار المشهداني وجت الطيارة وضربت عند قصر المحافظ عند زاوية المشهداني ، تبطحت الزلم ، الحمدلله جت سلامات بس من غبرة الصاروخ وجوهم بيض مو مبينة ألا عيونهم ،
أبو طلال : أبو عناد ياأبو عناد ،
أبو عناد : ها ها طيب طيب مابني شي ،
أبو طلال : قلتلي جدنا أمريكي من روس أميركا مو !!! والله لأبول بقبر جدك ، قلتلي حضارة وتقدم ، اليجي يسوي حضارة مايجي يقصفنا بالطيارة ....
بيان لرئاسة الجمهورية العربية السورية من دمشق :
بشأن عودة الرقة الحبيبة لحضن الوطن أو البقاء تحت الحماية الأمريكية الله مابينا وبين كسب الخطا وين يرتاحون أهل الرقة يضلون وشلون يريد أخونا ترامب نحن معاه ، ودگ أبو هند ...
بعد مرور عام .....
مطعم الروضة صارو إسمو (( بسطرمة ميامي ))
هات هات ياابني يا فيليب ثلث صندويشات نقانق ووحدة همبرغر لشباب مزرعة الأسدية ،
وجهزلي خمس وجبات هوت دوغ لشباب خس هبال وتوصالي بالخردل ،
أبو عناد يحاچي أبو طلال عالهاتف :
أبو عناد : يول شفت الجندية الجديدة ساندرا الفرزوها على حاجز حارتنا ؟
يما ياولي بنت الكلاب الأثم كرزة ، عجان الحارة من السبعة الصبح للسبعة بالليل مبسطين جدام الحاجز ،
أبو طلال : يول عجل لونك تشوف الأثنين الفرزوهن على حاجز السباهية ، بالحرام لونهن رقاويات سياگهن ٣٠ مليون ،
يول ماتجيني نروح نضرب دورة بالبيكاب ،
أبو عناد : بلا بالله جايك ، إلبس .
أبو عناد يحاچي أم عناد :
ماي هارت (( قليبي )) طالعيلي شورتي الفضي اللي رحت بي رحلة بال ٩٢ على الشاطئ الأزرق باللاذقية أني والموظفين ربعي بحوض الفرات ،
عالحاجز بالحارة مجتمعين خمس عجيان واحد منهم بزعيط أبن أبو عناد الصغير مسمي حالو جون ، العجيان كلها مسلهمة وفاتحة إثمها عالجندية الأمريكية ساندرا ،
والكل بالدورية يسألها : وطز يور نيم ؟
وبزعيط يقلها : تحبين الخاثير ،
ساندرا تضحك وتهز براسها ،
يرجعون يسألونها : وطز يور نيم ؟
وبزعيط يقلها : تحبين الخاثير ؟
تغيرت معالم الرقة ، دويرة الخضرة صارت كلها ميني ماركت وفواكه فيلادلفيا ، محلات الخاثر صارإسمهن أيس كريم بوسطن ،
فوق الجسر العتيج يمشون أبو عناد وأبو طلال بالبيكاب ،
أبو طلال : دحج دحج غاد أشوف بي ناس ملصخة بالنوبة ؟
ضرب فرين أبو عناد برضو ،
أبو عناد : أي والنبي ؟ هذول تعرف منهم ؟ أبو طلال : لا والله ؟ منهم ؟
أبو عناد : إن الله ماخيب ظني هذول جماعة الأتلاف ماتتذكر يومن وقعم على مذكرة الأنتداب الأمريكي والبند السابع يكون بي شاطى عراة عند الثلث طبقات ،
سبع هالطياز السود واحدهم يقول زلمبوح ،
كملم عالكورنيش بإتجاه الجسر الجديد من فوق الجسر يشوفون لمة چبيرة عند الزل العند معسكر الطلائع عالشاطي ،
أبو عناد : دحك ياالله شنهي هاللمة ، خلنا ننزل نشوف ،
أبو طلال : ياخي أكيد واحد غرقان يكون جاي مسيس من حويجة فيرجينيا ، الله يرحمو .
رجعم عالبيت طبعاً عناد إبن أبو عناد من أول إسبوع غير إسمو صار إسمو مايكل ،
أبو عناد : وير هاف يو بين تبوبح ؟ (( أين كنت تحوم ))
عناد : أي واز عند الفرا ، (( كنت عند نهر الفرات ))
أبو عناد : شكلك منت سبّحان ؟
عناد : عجل بي حدا سبح غيرهن !!!
محد سبح كلها مطججة عيونها وفاتحة إثمها وتدحچ ؟
أبو عناد : تدحچ على منو يوال ؟
عناد : الأ عجل مو بي ٥ جنديات أمريكيات يسبحن بالفراه بس بالسراويل ، والويلاد تنوظر وكل شوي واحد منهم يروح بين الزل خمس دقايق ويرجع عركان ،
أبو عناد : وين چنتم يوال ؟ لاتقلي عند الشاطي المقابيل معسكر الطلائع ؟؟؟
عناد : هو ماغيرو هناك ، ماشفتك يابا وين چنت خاتل ؟
أبو عناد بعد عنة : يول والله قلتلو لأبو طلال الخرية خلنا ننزل نشوف شبي ، يقلي غركان غركان ريت المي ماتعدي بحلگو ،
أميركا في الرقة
الجزء الثاني
طلع بزعيط من الحمام وسوا الشعر سبايكي وحاطلو جيل ولابس بنطرون جنز ومنصل البنطرون لنص طيزو ،
أم عناد : هذا شلون هيجذ شمسوي بحالك يوال !!! أشوف بنطرونك سالت وطالع طيزك ووين رايح ؟!!
بزعيط على إثم الباب يرد بطارف لسانو :
أول شي أني إسمي جون مو بزعيط وثاني شي بإميركا كل الويلاد تلبس بنطرون تالس ، والبارح ساندرا تغزلت بيا ؟
أم عناد : ياخيتي اللعبة هذي لعبة إيش الچبير من الصبح مبسط عند ساندرا (( تقصد عناد مايكل )) والعجي الصغير جاني چنو أبو الجعل زاد رايح يتنصب عند ساندرا ؟ وبعدين يوال أبو خريات عجل هي تفهم عليكم الأ تفهمون عليها ؟
بزعيط : ألا شلون البارح النهار كلو تقلي كريزي كريزي ، وتضحك .
أم عناد : شنو كريزي ؟
بزعيط : يعني سمارك يجنن ،
مها تتصل بعبير بنت جيرانهم :
هاي أبّورة (( اسم الدلع لعبير ))
عبير : هاي ميمي ،
طبعا ميمي زركة و كرعانها كرعان سملع مثل خيطان البوط ،
تروحين اليوم على بارتي حارة الملاهي ؟
ربيعتي مسوية حفلة باربكيو توديعة للبوي فرند تبعها (( فنّاش )) مسافر على قبرص ،
ترد عليها ميمي :
لا لا ماي لوڤ (( حبيبتي )) اني رايحة على حارة المختلطة ، بي كوافير جديد مسوي افتتاح (( كان حلاق بجرية شمال سلوك ))
و عندو عرض أزياء و انتخاب ملكة جمال المختلطة و شمال السكة ، معزومة بشكل شخصي عالحفلة.
فرن الفرودس صار إسمو معجنات هاواي ومعد يبيع ألا صمون يعني ماضل مثل أولي ولد مسؤؤلين يضربون صمون وولد طبقة كادحة تعلس خبز ، كلو صار يصلخ صمون ،
صفت الهمر جدام الفرن ونزلت النقيب هيلاري (( وحدات أمريكية خاصة )) تاخذ صمون ، ماجت على دور النسوان بوجهها على دور الزلم ، وفاتت زرن عالطاكة ،
النسوان الصافات عالدور
أم صبوح : أبوووووووو العاسرة الدعور ألا فاتت بدور الزلم .
أم ربيع : دحجي بنت الكلب يقول بلچكتور عجب شنهي الخلطة التستعملها ،
أم صبوح : من الله من الله الله خالقها هيچذ إنتي قضيتي العمر عند غيفون وتجيبين خلطات من التاجرة هنودة وضليتي زركة ، تصفن أم صبوح ، أيواااا توني عرفت عليش زلم الحارة كلها قامت تجي تاخذ خبز ، والنبايا الشياب تدور هسهسة !!!
تقسيم الرقة :
المدينة صار إسمها نيويورك سيتي ..
الخط الشرجي : ريف كاليفورنيا
الخط الغربي : ريف واشنطن
الخط الشمالي : ريف دنفر
الشامية والصبخة : كارولاينا الجنوبية
الطبقة : كونكورد
حارات السكة وشارع القطار : شيكاغو
الثكنة : أوستن
بقلب القسم الشرقي :
اآي دونت نو !! آي دونت نو !!
العريف الامريكي يحاچي أبو خميس وقدور بالقسم .
أبو خميس يقول لقدور : قلو نريد نشوف الضابط المناوب ألحزتيناتي هالدقيقة ،
قدور يحاچي العريف : هو يريد يسوي (( سي يو )) للضابط ؟
العريف : آي دونت نو !!! نو أندرستاند ؟ كو كو سلهبية ..
أبو خميس يدحگ على قدور : جعد يسبنا ابن الداشرة مو ؟
قدور : لا عمي جعد يقول الضابط راح يحضر عزا بالسلحبية ،
العريف : فينش فينش ،
قدور : لكطتو عمي والمصحف الزنوة يقول عنك أفنش أفنش ،
طلعم من المخفر أبو خميس وقدور ويريدون يروحون عالجرية زيارة لعم أبو خميس ، من جدام المجمع مرم وچان تصف هالمرسيدس السودة المفيمة ، وركض الشفير فتح الباب ونزل منها الزلمة المطقم ،
قدور : منو هذا عمي بيل كلينتون ؟
أبو خميس ضحك : بلكنك البين هذا شكارو ببيل كلينتون ، هذا الوجيه فلان الفلان ،
ألا عجل مو صار للوجهاء بالمجمع وكل قسم لوجيه ، وماضل صبيب قهوة صارن سكرتيرات يمممح يقولون الوجيه فلان إش جايب سكرتيرة من المكسيك إذا تنعجد صلحة وتتعسر من تفوت السكرتيرة تضيف القهوة تنحل المشكلة كلها تسلم ، وبعدين ماضل قصر محافظ صار إسمو عمدة نيويورك ، وفرع الحزب صار اسمو مجلس الشيوخ ،
ركبم الباص وطلعم عالجرية ، بيت عم أبو خمس عالطريق العام ، نزلم وچان تجبل من بعيد عاجوز لابسة بنطرون وقميص والشعر أشكر مسوية ميش وجهها كلو دگوك ،
قدور : دحك الزنوات الأمريكان حت هنود جابم معاهم عالرقة ،
أبو خميس : هنود إيش يامصخم هذي مشية عمتي قبشة مرت عمي حسين ، ياولي شمسوية بحالها ،
عدت بهاللحظة سيارة أمريكية وسلم اللي بقلبها على قبشة : هلوووو كبشة هاور يو ؟
قبشة : طيبة طيبة رايحة عالدكان أعبي وحدات ،
سوت حالها ماتعرف قدور وأبو خميس تقلهم : وير (( أين )) يكون المحل تبع التاتو ؟ وكملت طريقها ،
أبو خميس يصفق بيدو عليه العوض ومنو العوض ، عمتي قبشة تريد تسوي تاتو !!!
صارم جدام بيت ابن عمو طلع إبن عمو ولابس شورت ومن فوق مصلخ ويدخن سيجار ، إبن عم أبو خميس إسمو قزي بس مسمي حالو ماريو ،
قزي : ويلكم ويلكم مرحب مرحب ، سيدم سيدم غاد عالمشراكة (( أجلسم عالشمس ))
لسع ماكعدم وچان تجي هونداية مازوت محملة تخوت ،
قزي : هير هير إحدرهم عالسكية ،
أبو خميس وقدور فاتحين إثمهم ،
أبو خميس يقول لقزي : شنو هذن قزي ؟
قزي : ماريو ماريو الله يسلمك لاتقول قزي ،
أبوخميس : هذن شنهن ؟
قزي : عندي الأولاد بطلم ينامون على دواشك
وسنفجات مثل أهل الجرية صار كلو تخوت ؟
بتعداية سيارة للامريكان ،
قزي : كم هير كم هير علي الطلاق الا تحدرون ، كوم إيت لونش (( تعالوا نتغدا سوا ))
الامريكي : هاااي كزي ، سوري سوري هاي ماريو ، ڤات دو يو إيت (( ماذا عندك أكل ))
قزي : دو لايك تو ايت كوردون بلو ، سكالوب ، فاهيتا ؟
الامريكي : وواوووو واوووو ريلي ؟ (( حقاً ))
أبو خميس : شنو القصة قزي خاف يريدون ياخذونك إحتياط ،
قزي : هههههه لا لا ياخي بس عزمتهم على كريض بيذنجان ومقلي كوسا ، والمسكين مو مصدق يحسبنا ذابحيلو فطيمة ،
يطلع من الصيرة إبن قزي جاسم مسمي حالو توم ، توم راكب الجحش الأملح ولابس طاقية الكوبوي وچزمة مبوزة طويلة لفوق الركبة وبيها حلقة ،
أبو خميس : قزي هذا مو جسوم إبنك ؟
قزي : قصدك توم أي أي هو ، حالياً جعد يتدرب عندو تصوير فيديو غاد بالبرية لدعاية لدخان المالبورو .