السبع الادرع
وچان أبطحو وأضل أدبچ ببطنو تا ضرطتو ،
وما فكوه مني الأ محد أخو حدا ، عجل إبن الكلب يزاورني من بعيد يفكرني طنطا ، تعرفين مرة حنزت ست عجيان فايتين عالحارة تا يبوقون عنكدنية من شجرة جيرانا ، خيتو كل ماأجدع واحد چف تطير خنتو غاااااد ، اليقوم يبچي منهم أدشرو واليضل صامل أضل ألخلخلو تا يقول توبة ، يقرب عليها ويشاورها : بشرفي وبعرض اختي چنت ضابع الحارة كلها ،
عبود صف حادي عشر منهزم من المدرسة وماشي مع خطيبتو صف عاشر ومدرهبة (( مدعبلة )) وشاربها أطول من شارب عبود ، جايين من مدرسة الرشيد باتجاه حديقة البجعة ، عبود مايحب يروح على حديقة سبعة نيسان لانها مشموسة ويسمونها حديقة العشاق ، وحديقة الرشيد مليانة ناس مبسطة عالعشب تضرب فلافل من الملك ، عبود يحب الستر .
وهم ماشين عالرصيف ، بي عالرصيف الثاني وليد زغير شايل بإيدو خبز حار جايبو من فرن الفردوس ،
خطيبة عبود قامن تشهون : ياالله دحگ عبود الخبز شكلو تازة يشهي ،
عبود عرم صدرو وصاح للوليد الزغير : تعال يوال هات رغيف ،
جا الوليد الزغير المسكين وناوش عبود رغيف خبز ولمن مشا ضربو عبود طيارة زغيرة ،
خطيبة عبود : ليش ضربتو حبيبي حرام ؟
عبود : كعد امزح معاه بعدين انتي ماتعرفين شلون تتصرفين مع الناس ، هذول بدهم دوم العين الحمرة ،
وصلم عالحديقة فات معرم ومعرّض عبود عالحديقة وطوا طارف القندرة (( كسرها )) وفتح ثلث زرارات من البدلة ومو شايف حدا جدامو ، وخطيبتو مهي خايفة من عنتر معاها السبع الأدرع عبود ياكل راس الحية ،
بي كرسي بحديقة البجعة بجنب باب الحديقة اللي من طرف الملعب ، الكرسي شوي مستور وعريشة الشجرة مغطيتو ، كعدم وحط عبود رجل على رجل وسگطت قندرتو مو جان كاسرها وطلعت الجرابة مكشومة ،
فاتم ويلاد صغار من الحارة تايلعبون طابة ، وهما جعد يلعبون عالعشب طيري يالطابة وإسطري خطيبة عبود بنص راسها ؟
هي من اولي مشوهة وإنّثرن الشعرات ياسلام شلون صارت هولة ، عبود شاف الموناليزا شلون كفشها إنفرد من الشوطة وچان يطالع الموس الكباس ويشگ الطابة ، هين العجيان من إنصابت خطيبة عبود إنهزمم ، صاحب الطابة الوحيد ماانهزم واقف بعيد ، يومن شاف الطابة إنكشمت قام يبچي وويركض ويسب عبود ، وراح صاح لاخوه الأكبر منو ، تقريباً أصغر من عبود بشوي ، وجم هدادين ،
أخو العجي ابو الطابة لسع ما قال لعبود عليش شكيت الطابة ؟ وچان عبود يصلخو چف طير شرار عيونو !!!
عبود : عجل الكلاب يضربون العينتين بالطابة ، هين عاد العينتين ردت الزلف وطلعت كلها يونس شلبي ، ركض العجي أبو الطابة وأخوه الچلا چف ويسبون بعبود :
يااخو ال ......... إذا زلمة إستنى دقيقة والله لأ.......... أمك .
غابم يجي ربع ساعة ،
خطيبة عبود تسألو : قلبات انت تعرف الحارة هاي ؟
عبود: ول شبيج قلبي أني الحارات هاي كلها ضابعها وبالليل لمن أجي عالحدايق هذن مايضل بيها حدا كلها تنهزم ،
عبود يحچي كمالة القصة لربيعو بعد سنين :
خيو بعد ماضربت العجي انهزمم العجيان ، وبعد شي ربع ساعة جا واحد من عند الباب اللي مقابيل ابو حيون ، تخيل يارعاك الله يومن فات عالحديقة وطى راسو من جوا الباب يامحمد ياكثرو ، أني يومن شفتو فايت وعينو علينا قلت مو معقول أبداً يكون جاي علينا قمت أتلفت حوالينا وأقول بقلبي يارب جاي يسوي رياضة وطلع فعلاً جاي يسوي رياضة علي ، يومن العجيان صاحم جبار جبار هذاك هو اللي معاه عجية ، خيو أني ركبي سلتن ، المعاي تريد تقوم تنهزم وچان أكضبها من إيدها وأقلها بصوت عالي :
ضلي ضلي وين رايحة ؟؟!!
هي تحسب أني مو خايف وبدي ألحز أشوهو وأني يااخوك أريدها تضل بلچي جبار يراعي إنو معاي إنثى الله يجعلها إنثى ومايضربني ،
خيو انت مو تعرف بلاطات حديقة البجعة شكد كبار ، جبار يومن جاني يمشي أحسهن قامن يرجن جواه ، لسع ما وصلني أريد أقلو كلمة معلم وصلخني چف كعدني عالكرسي ، ربيعتي بكل أدب سلتت راحت تمشي لغاد ،
خيو وقفني وقضبني من قبة البدلة أريد أقلو تعرفني أني إبن منو ؟ لسع ماكملتها صلخني الچف الثاني إذني مو قوتو رنت ، قلتلو أني كلب ابن ستين يومن شگيت الطابة معلم بشرفك مو جدام الخطيبة ، هين عاد جم العجيان وگربم علينا ، جبار يسأل خالد (( العجي اللي ضربتو ))
سبّك شي يوال ؟
خالد : أي سبني بأمي وأختي ،
شالني جبار فوق وزتني جوا عالعشب ، خيو وأني طاير بالهوا شفت ربيعتي تضحك طلعت الدنيا من عيني ، نزلت على ظهري ، أقلو والله ياجبار مو عيب علي أسب عرضك عرضك عرضنا ياجبار ، وينام علي شوط والعجيان الصغار واحد يتفل على وجهي وواحد يشلحني القندرة ويلطني بيها ، أدحگ على جبار وأقلو إسأل خلود (( أقصد خالد كمت أدلعو إبن العرص )) والله هو جف واحد وبارد زاد مزح مزح ، الشارع ماضل بي حدا على حظي ، أدحگ على ربيعتي واقفة غاد بقلبي يا بنت الكلب إطلعي وقفي تكسي وإعطيه ٢٥ ليرة قوليلو تعال بس حجّز !!! هفي حالچ على أبو حيون أكيد المطعم مليان من عمامنا يضربون سودة عالريج جيبي حدا منهم يفكني ، أو إنقلعي روحي عالبيت خليني أكل چتلة على راحتي ، خيوووو ذبحوني ذبحوني يومن عاد دشروني جا العجي الصغير ابو الطابة وداس ببطني وكمل ،
يومن شفتهم راحم صحتلها بنت الكلب قلتلها جيبيلي خرطوم المي تبع الحديقة ، شفت شعرضو ؟ الأسود ياخي ؟ مفتوح عالاخر وأني حاطو على راسي شربت يجي خمس لتور مي من حرة قلبي ، خيو ضليت سنتين ما اعدي من الحارة ولمن حدا يجيب سيرة حديقة البجعة أقوم أتهاوع أريد أراجع ، يومن حدا يصيح جبار أحس قلبي سگط ،،، طبعاً ربيعتي من يومها أدك عليهم وتسكر بوجهي وماعرف شنو السبب !!!!
وبحياتك لا تضرب مراجل جدام خطيبتك ماتعرف منين يطلعلك جبار ...