فندق الرصيف
قصص شاوية
لدنه شوايه
الساعة ٨ ليلاً الرصيف المقابل لمشفى التوليد . تچسيع ونوم ومبيت حسب مدة (( الطلق والولادة )) ..
المستخدمة تصيح من ورا الشبك
اهل نجاح ؟؟؟ اهل نجاح ؟؟؟ اهل نجاح ؟؟؟ طبعاً حت صاحب ضيافة إيبلا سمع إنو نجاح قامت بخير وسلامة وولدت ، رجل نجاح متمدد بالسويت اللي عالزاوية مقابل باب مدرسة الفنون على حصيرة وحاط رجل على رجل ويدخن . قام يركض عالباب المبشرة من ورا الشبك وهي مبتسمة وتاكل بزر تقول لرجل نجاح . مبارك جتك عزبة مثل القمر، طبعاً هي ماتعرف انو نجاح عندها قبل هالبنية ٧ بنات وماعندها ولا وليد ، فوراً باللاشعور رجل نجاح (( ناقص العقل والدين )) قبل مايسأل عن حالة نجاح چبق المبشرة تفلة من وراء القضبان استقرت على جبهتها وقاللها الله ياخذ هالوجه مكيفة جيتي تبشرين..
المبشرة : والله ماياخذ الا وجهك الجايف زعم شتريدها تجيبلك صلاح الدين الايوبي ..
عادت الحياة الطبيعية الى الرصيف وبلش شرب الچاي وضرب الدبشي وناس تتعشا فروج ترامس الچاي أشكال الوان . بالصدفة تمر زفة من جدام الرصيف من وحدة السيارات عجية تطالع راسها وتصيح شواياااا شواايا ، الله يجيب عجي خنابة من نزلاء الفندق يتف السيارة بحز دبشي (( فاضي )) يجي بنص وجه الامية يسويلها (( ماسك بنكهة البطيخ ))
الطبيب الاخصائي يلعب ورق المسا بنقابة الاطباء وموصي الطبيب المقيم مايخبرو الا تستوي المريضة ويكون وضعها صعب . واذا يجي خسران البرتية يتفشش عاد بالممرضة والمريضة وحت الجنين . صارت الساعة ١١ هدم النضيدة وإنمدت الحصاير والطراريح والبطانيات وبدأ العزل الحرملك لحال والزلملك لحال . نام الجميع من التعب ومن ريحة الحاويات اللي على زاوية المشفى وصوت الشخير مسموع من عند البنك التجاري . الساعة ٣ الفجر اربع تكاسي اجرة صافات جدام باب المشفى الشفيرية باطحين الكراسي ونايمين من سمعم حمي الطلق يحمون السيارة . الشباب طالعة سكرانة من المسبح مرم من جدام مشفى التوليد واحد يريد جداحة يشغل سيكارة يقعدلو بشايب مسكين متليش من التعب يقلو حجي عندك جداحة ؟؟؟
الشايب متلفع بالجمدانة وعلى عيونو النوم يرد عليه : أمونة جابت ؟؟؟؟
السكران : شنو جابت حجي يستر عرضك اقلك اريد جداحة جداحة الشايب : أمونة جابت جداحة ؟؟؟
إكعدي ياعاجوز الشايب وچان تصيح عالسكران ياووولي هبلم الزلمة روح ابويااا روح رجلي مايدخن طبعاً هين بهاللحظات السكران الثاني جعد يبول بمدخل حديقة الاطفال وهو يبول يسأل ربيعو ... لقيت جداحة ؟؟
العاجوز ترد عليه : أي بلاوووو من بوالتك يابو صنة لگى جداحة ، الحق مو عليكم لا والله الحق على كل مسؤول بهالبلد داشر ابن داشرة خلانا ننام بالچول وبالشوارع مثل الدواب