الجروح قصاص
قصص شاوية
لدنه شوايه
شكد الساعة ؟؟؟
أبو احمد يسأل واحد من البويچية المبسطين على رصيف المحكمة جدام البراكيات
البويچي : بوية مع تلميع بخمسطعش .
أبو احمد : يوول الساعة شكد شكارني بالبويا زعم قالولك فايت على خدام .
البويچي : حجي تريد تنظيف قبل البوية اسويلك ببلاش ..
أبو احمد : يول بس انقلع الله ياخذ المهبول وعيشتو .
المهم التاسعة صباحا.
جدام القصر العدلي بالرقة المحكمة
أول مرة بحياتو كلها يجي أبو أحمد عالمحكمة ،
أبوأحمد الزلمة الرقاوي عمرو ٧٠ سنة طويل مشودح راعي شارباً عريض ونص الشارب مصوفر من ضرب دخان الغازي ، چتافو عريضة وچفوف إدينو بعرض چف الكاروك وعزمو عزم الحصان من ضرب الزبدة والحليب وشغل الگاع قضى حياتو كلها بالبرية عند الدواب ويزرع كاعتو .
أبو أحمد جاي شاهود يشهد مع زلمة جار لوا من حول حلب أولي بلشان چاتل زلمة بالغلط وجاي زابن بالرقة بجرية أبواحمد ، ومشتري قطعة أرض من ابن عم أبو أحمد ، إبن عم أبو أحمد إسمو حواس واحد عفن سربوت وصخ روح قلبو السلبطة بيوم وليلة قلب عالزلمة الحلبي المسكين ويريد ياخذ عشر متار من طارف الارض البينو وبين أرض أبو كرمو ،
أبو كرمو (( الزلمة الحلبي )) قصير ولابسلو كلابية بيضة وجواها شرول أسود عريض ولاف الجمدانة على راسو لف جاي عالمحكمة وخايف لانو مابي لا عقد ولا صخام وهو غريب بنص جرية .
أبو أحمد : هاي شبيك أبو كرمو إكرب حالك علي الطلاق مازال خشمي يكرف الغربي ماياخذ من كاعتك نونو شبر لون ياخذ واحد من ولدي .
أبو كرمو : الله يطول بعمرك أبو أحمد بس تعرف ابن عمك حواس واحد مشراني ومابيخاف الله
أبو أحمد : هااااي شبيك ؟؟؟ قمت تزارب من ألحز إكرب حالك بووووو يبوووو عجل مو قلتلك عندي بالحرام اللي يجي صوبك انت وعيلتك ألا أدعي نارها لچبد السما وأنا أخو أمي باطل باطل وچان يطلع صفط الغازي أبو أحمد ويدرجلو سيكارة على إنزعاج .
فاتم عالمحكمة وقفم بساحة المحكمة الداخلية طبعاً تزت الابرة تسقط فوق كرافيتا من كثر الزحمة .وتكاسي صفر تصف على باب المحكمة وتنزل من الاستاذة والانسات الجميلات وطقوم فضية وكحلية وقنادر تتلامع وكل من شايل بإيدو مصنف ومكرفون اذاعة المحكمة من الصبح شغال تحس حالك بتحية العلم بالابتدائي ونص عربنا مبسطة جوا بكافتيريا المحكمة وتصلخ چاي عالمشراقة والمحامين قاعدين يعلمون المدّعى عليهم شيسولفون . ايامها المحامي العام محمد زكريا الرفاعي الله يذكرو بالخير ويمد بعمرو .
أبو أحمد بي واحد من قرايبو سكان المدينة متفق مع محامي قرايبهم من المدينة لسعو مبتدأ بس بحكم القرابة يريدون ينفعونو . المحامي لسعو شبيب وعالموضة أجبل من بعيد لابس هالسبور وحاط جيل على شعرو وفارق الشعرات بالنص يقول فارقهن بشنتيانة .
أبو أحمد : أنت ابن فلان
المحامي : بإثمو علچة ، هلا هلا عمو أي أني إبنو وحيل وصاني بيك .
أبو أحمد : شيل البلية ال بإثمك وإكرب حالك يومن تحاچيني .
هين وصل باص السجن الابيض ونزلم المساجين تاينعرضون عالقاضي .
نزلت الزلم مكلبشة أبو كرمو يقول لأبو أحمد
أبو أحمد لك هاد مو
...................
نزلت الزلم مكلبشة أبو كرمو يقول لأبو أحمد
أبو أحمد لك هاد مو حنفيش إبن أخو لحواس .
إندار أبو أحمد وإنو حنفيش مكلبش وشعرو شعر السعلوه وحفيان ،
أبو كرمو : أبو أحمد ليش جايبينو لهون ؟؟؟
أبو أحمد : العجي الوصخ هذا حرامي بالزمانات باگلي نعجتين ، أبو كرمو يسأل : طيب ليش مكلبش ؟؟!!
أبو أحمد : هذي محكمة تريدهم يجيبونو بسيارة المحافظ نفاخ ركز عليا ولاتعل قلبي الله يرضالي عليك نهارنا طويل . بي محامي قاضب شايب بزاوية جعد يحفظو جملة تايقولها جدام القاضي (( الجروح قصاص )) أبو كرمو فاتح إثمو إثم النعجة ومراقبهم . المحكمة تعبت بشر وأكثر شي الفوضى جدام مكاتب قاضي التحقيق بالطابق الأرضي بين الشرطة والمواقيف ،
والمستخدمين (( الأذان )) من يشوفون واحد لابس خاچية او متطقم وعليه الهيبة تحاوفوه مثل الحصاني وتناوشم المصنف منو ،
أبو أحمد يقول للمحامي الشب ول ها ابن أخوي ماجا دورنا . يرد عليه المحامي طول بالك عمو لسع قاضينا بالقوس .
أبو أحمد : خاف بعيدة القوس الكشرة ويطول تايجي ، يحسبها أبو أحمد منطقة .
المحامي ضحكة خفيفة : لا لا عمو القوس هو محاكمة الاشخاص بغرفة يكون بيها قفص الاتهام والمستشارين وأطراف القضية والشهود والجمهور . بالزحمة مدري وين ولى أبو كرمو صار دورهم قام أبو أحمد والمحامي يدورون لأبو كرمو . أبو كرمو ثاريه طالع يستكشف المحكمة المهم لقوه جدام الدايون اللي يدوام بي نشوان سبع الدير بالطابق الثاني .
أبو أحمد : وين أبو كرمو رحت تبوبح مثل النعجة الثولة مو تعرف عندنا شغل هذي محكمة ياأبويااا مو سوق جمعة .
أبو كرمو يشاور أبو أحمد : أبو أحمد شو معنى الجروح قصاص ؟؟؟
أبو أحمد : والله مدري يمكنها جروح مستلهبة
المهم فاتم عالمحاكمة حواس من شاف ابو أحمد خري على حالو .
أبو أحمد يشاور المحامي الشب : ابن أخوي تعال للقاضي من راس علوه من أولها وإحچ كلشي تعلمتو .
القاضي يسأل حواس انت على وضو مشان يحلف عالقران إنو يقول الحق بما إنو مافي أدلة وبراهين ، حواس : سيدي القاضي أقسم بالله سأقول الحق ، لقد أخذ مني أبو كرمو نصف كاعتي ولم ينطيني حگها
أبو أحمد : أول شيا ياسيادة القاضي والله تراهو مو على وضو ماشميت ريحتو يومن فات عالغرفة يقول فاطس جو هدومو جرو ، والله ماصدق هالبوز الوصخ يحچي نحوي ابن ام عذوك (( الشعر المتشابك ))
القاضي : منو قاس الارض بينكم
حواس : لقد قمت أنا بچيالتها،
(( قياسها )) أبوأحمد يزووم (( يهجم )) على حواس بيش قستها يوال چذوب ؟؟
القاضي : ياحجي ياحجي هذي محكمة مو سوق أحطك بالحجز ها .
حواس : سيدي شوفلو لقد رشني بأمي ،
أنا چلتها (( قستها )) برجلي .
أبو أحمد : اي بلاووو كرعانك السود يقول جدح مشمش محروقات (( شجرة المشمش بعد الحرق )) صارن متيرررر وتقيس بيهن يازنوه .
القاضي يسأل أبو كرمو : هل لديك أي أوراق أو أدلة تثبت ملكية الارض لك ،
أبو كرمو المسكين ثاري ناشف ريجو من منظر المنصة والمستشارين : لا لا سيدي القاضي ماعندي شي . القاضي يطلب من أبو أحمد يقسم اليمين مشان الشهادة ، أبو أحمد يحط إيدو عالقرأن : وحات كلام الله بحياتي ماعديت الا الصحيح ، حواس زلمة بطلي وعفن ويريد يتسلبط على هالدرويش الفقير. هين أبو كرمو جعد يمد إيدو بجيب الجاكيت الجواني والكل عينو على أبو كرمو يحسبونو يريد يطالع عقد او وثيقة . وإنو أبو كرمو يطالع حبة بزر عاصية بزاويا الجيب وياكلها جدام الناس .
أبو أحمد : إممممممم ك ....... أم جبو والله أدريبو ألا يرفع ذقطي . باب الغرفة مفتوح لانو الجلسة علنية وليش ماتمر
...........
باب الغرفة مفتوح لأنو الجلسة علنية وليش ماتمر متدربة طركة طويلة كل القاعة حتى المستشارين جلّست ظهورها وقعدتها وفاتحة إثاميتها تدحق عليها، أبو أحمد قام يعدل بالعقال وقام يسدل بالشوارب ،
القاضي : البيع يحتاج دليل مادي وحكمت المحكمة بعودة الارض للمدعو خميس البرهوش الملقب (( حواس ))
هين أبو كرمو خرت دمعتو (( دمعة المظلوم غالية )) يقول للقاضي : له له ياطيب والله كنت ناوي إزرعا بندورة وبزر عين شمس ،
أبو أحمد : يخسى زمان الشر ويحاچي القاضي ، سيدي القاضي ماني أخوك الچبير حولنا عالبشعة والله حواس چذاب ، (( البشعة حرق اللسان بصيخ نار )) حواس چان فاتح إثمو سكرو ، دنجر أبو أحمد ومد إيدو على جدم رجلو ،
حواس : دحجلو سيادة القاضي يريد يحشني بالقندرة . أبو أحمد من كثر ماطول وهو مدنجر وجهو خنق ومعد يطلع صوتو : يول بس أكل خرا بي سن قطن (( شوكة )) براناتي (( جراباتي )) من أول الجلسة وهو يدقني أطلع روحي الكواد ، طلعم من القوس أبو أحمد يقول لأبو كرمو يول والله وقبر محمد رسول الله مازالني طيب ماياخذ فتر من الكاع جاري وتنظام انا أخو عمتي . بالكريدور بي مراة قاعدة بالارض تلبس ابنها الصغير كلاشو وتبچي وتدردم الله لايوفقكم لانو مالي حدا تريدون تطالعوني من بيتي . جاها أبو أحمد النشمي مثل الصكر شبيچ بنيتي عني تبچين ، شرحتلو الوضع وچان يمد إيدو على جيب الصاغو ويطالع ٢٥ ألف ليرة ويناوشها ، هاچ أبوياا خذي وليدچ وروحي ادفعي أجار بيتج وضلي حرة ومايضيمج ضيم ،
المراة : الله يوفقك ياعمو ويمد بعمرك يارب
طلعم من المحكمة أبو أحمد عيونو تجدح شرار يقول لابو كرمو خلنا نفوت نشرب سيكارة وكاسة چاي أجس راسي بكد القوس (( قام يعرف القوس أبو أحمد )) المهم رجعم عالجرية أبو كرمو سد وجهي الطريق كلو لاوي رقبتو رقبة الحردانة .أبو أحمد يهدي بي ويقلو والله أني أخوك وجارك والكاع كلها ترجع بس طول بالك علي ، وأبو كرمو يهز براسو بمعنى موافق موافق . وصلم البيت مرت أبو أحمد إسمها فطيم تلكت رجلها ها ياخيي شسويتم ؟
أبو أحمد : والله خذا الكاع الكلب ابن الكلب ينعن قواويش إمو الجايفة .
تغدا أبو أحمد وحط راسو ونام . العصر تفوت عليه بنتو وهو نايم : يابااااا يابااااا إقعد عجيان حواس هدم على حوش أبو كرمو .
وچان يقب أبو احمد رمى اللحاف من فوق الدوشك وطلع يركض تناوش السنديانة وطلع مفرع وحفيان ورافع شليل كلابيتو أم أحمد فطيم تهلهل وهو يحدي (( يغني )) لحالو :
إسمع شتقول فطيم إسمع ..
أم ترچية وطوقاً يلمع ..
عينك يا الظالم ما تنام ..
وجارك يا الرقاوي ماينظام ..
ولد أبو أحمد لاحقينو واحد شايل كاروكة وواحد شايل قلاعة شوندر وواحد مو شايل شي مشان الاسعافات الاولية .
وصل عالباب وتف الباب سنديانة وإنو الباب من العام يلوح غاد . فات لكا حواس بالكلسون طالع من الحمام وچان يزوم عليه ويندفو سنديانة بنص فخذو وإنو حواس ممدد بنص السكية . مرت حواس مرتچية على باب المطبخ حواس چاتلها الصبح يومن شافتو ممدد تقول : إوووف إوووف خلك الله يحني إيدك ياابو احمد .
حواس وهو ممدد ومصاب : فرحانة ياشرموطة والله لي راحم لأصلخ جلدة راسج .
أبو أحمد : دحج علي يوال والله والله والله وبالحرام وبالذمام إن مارجعت الكاع لابو كرمو الا امزرك فشكة وأحط هالعمر بطيزك عبنو غريب يول ياعفن ومالو حدا نتسلبط عليه وناكل حلالو تخسى يالطگوع ، شالم حالهم أبوأحمد وولدو ورجعم عالبيت .
مابي بعدها بساعة جا حواس يعرج على رجلو ودق باب بيت أبواحمد وقايد بيدو أبو كرمو .
حواس : أبو أحمد أخوي أدريبني قلطت وحقكم علي والكاع رجعت لابو كرمو وماشاء الله لسع حيلك عليك الله لايوفقك ، أبو كرمو مبسووط چط وحب راس أبو أحمد وقام يبچي الله يوفقك ياخاي روح الله يجوزك .
والله شربم چاي وكلمن تهير تايروح على بيتو . جعد يودعهم أبو أحمد عالباب ، أبو كرمو يشاور أبو احمد : لك خاي صحي شو معنى الجروح قصاص ؟؟
أبو أحمد : إمش إمش من هين لاصيحلك حواس يوال ..