عالحصاد
قصص شاوية
لدنه شوايه
الصبح وقت الفجر من الشفاگ منظر حصادات الچايه من عين العرب والدرباسيه وهي تعبر الجنوب الى ابو فاس عاصمة الحنطة والشعير الجنوبي العظيم.
حسان وهو طافخ بالانتر شايل برميل مازوط ٫وجايب درجه الخيوط الي لفلفتها حبابه صيته على الطربيزه ولونها اصفر وشده اخرى بلون الاحمر تشبه شراين الدم يخيطون بيها چوالات الحب .
يرسمها الاخرس خياط الحصاده الي جان ينعرف بحيلوا وقوتو چان ما يخاف من العرابيد التتطلع بوجهوا بالحصاد ويمسكها بيدوا .
واغلب معلميه الحصادات من الكراد تلاقي العتال يشيل حمل ميه دونم ولا يقول اخ
تلاقي المصلحه (وهي بمقام غروب العمال) تتالف من شفيريه الحصادات وهم اعلى رتبه ميدانيه وبعدهم شفيريه التركتورات الي تنقل الحب و الچوالات .
ويليهم بيادق من العتاله وعاده ما يكونون سربيسين او ثلاثه حسب كل مصلحه وحجمها وعدد دراساتها وحصاداتها
واضافه للمكنيكي والخياط واهم واخر عنصر هو الطباخ وهذاه عليه مهمة اعداد وليمه يوميه ثلاث اربع مرات ممكن اكثر للمصلحه الي تاكل الحجر .... الشغل والتعب يخليك تاكل حام حيم وخير طعامهم البطاطه على انغام اغاني شوفان وعمر سليمان وسعد الحرباوي
ويقول الحرباوي
ليله فرح ليله عيد
ومن طقوس الحصاد الـگـروات (الاتاوات) الي تعتبر خارج حسبه الزكات
فتلاقي يكثر بهل الو گت الشواحيذ واخص منهم الشعار وهذول المايعطيهم يفضحونو بين العربان جماعه سمران شايلين عبيهم وراكبيلهم مطور رچب تلاقيهم من عرب لعرب ياخذون حصتهم چوالتين ثلاث حسب ومنهم يچون معاهم ربابه يربربون ويمدحون بگصيدهم على راعي البيت يدعونوا فوق الشسمو بشويه من هل الشعاعير (جمع شاوي مكسر للشعر) الي ما تعبي خرج غيرهم ولا تشبع خبز .
ومن الاتاوات المجبور المزارع يدفعها هي حصت مدير المخفر الي يجي شفيرو ياخذها وياخذ هو زاد حصتو تلاقي نهايه الحصاد جدام المخفر ساتر تحسبو دشمه حرب وهو كدس حب من هل العالم
وبي حصه ابـــو چــرخـــه وهذا يعتبر بتعاريف اليوم مشلحجي له حصه من الغنم الي تربع بالخط الغربي من الجبل وانت محدر للدير كل الظهره لو زلمه شبر ونص بس ما ينگدرلو حواليه شله من جماعتو يبوگون الكحل من العين وبدون ما راعيها يحس هاي في حال ما دفع داعي الرزق البيه النصيب .
ورغم كل هذا بس چان الحصاد وقت يبلش الكل يفرح الغني والفقير يتساوون بهل اليوم من كثر الخير چانوا اهل الحسچه مايريدون حت رواتب وچان الخير يطمر الناس طمر حبنا چان يوصل لايطاليه يسوون منو معكرونه ولازانيه
القرية كلها في حالة اعلان النفير العام
دور اليواخير تم تفريغها تايعبوونها بالتبن بي عالم شغلتها تشيل خماشتها وتلم السفير وتدقوا اخر الوگت وتبيعوا بالشتا لي صار سعروا غالي .
اكثر شي استفقدوا صياخ ربطات الچوايل الي چنا ندگها ونطرقها نسوي منها سيوف ونلعب جوارح وكواسر اسع العجيان كبرت وصارت تلعب بوبجي